ગ્લોબલ માર્કેટમાં સોના અને ચાંદીના ભાવોમાં તીવ્ર ઘટાડો નોંધાયો છે. અમેરિકી નીતિઓ અને ડોલરની મજબૂતીના કારણે કિંમતી ધાતુઓ પર સતત દબાણ વધી રહ્યું છે.
ગ્લોબલ માર્કેટમાં સોના અને ચાંદીના ભાવોમાં તીવ્ર ઘટાડો નોંધાયો છે. અમેરિકી નીતિઓ અને ડોલરની મજબૂતીના કારણે કિંમતી ધાતુઓ પર સતત દબાણ વધી રહ્યું છે. શુક્રવારે મલ્ટી કોમોડિટી એક્સચેન્જ (MCX) પર સોનું અને ચાંદી બંનેના ભાવમાં ભારે ઘટાડો જોવા મળ્યો હતો. અમેરિકી ફેડરલ રિઝર્વ દ્વારા વ્યાજદરમાં વધારો થવાની શક્યતા અને મજબૂત ડોલરના કારણે બજારમાં નબળાઈ આવી છે.
સવારે 11 વાગ્યાની આસપાસ MCX પર સોનું લગભગ 2.06% ઘટીને ₹1,46,240 પ્રતિ 10 ગ્રામ પર ટ્રેડ થઈ રહ્યું હતું. ચાંદીમાં વધુ મોટો ઘટાડો જોવા મળ્યો અને તે લગભગ 3.73% તૂટીને ₹2,28,721 પ્રતિ કિલોગ્રામ સુધી પહોંચી ગઈ હતી.
ફ્યુચર માર્કેટની શરૂઆત પણ નબળી
MCX પર ફ્યુચર માર્કેટની શરૂઆત પણ નબળી રહી હતી. સોનાના ફ્યુચર કોન્ટ્રાક્ટ લગભગ 1.43% ઘટીને ₹1,47,175 પ્રતિ 10 ગ્રામ પર ખુલ્યા હતા જ્યારે અગાઉનો બંધ ભાવ ₹1,49,378 હતો. ચાંદીના જુલાઈ ડિલિવરી કોન્ટ્રાક્ટમાં પણ ભારે ઘટાડો નોંધાયો અને તે ₹5,000થી વધુ તૂટીને ₹2,32,371 પ્રતિ કિલોગ્રામ પર ખુલ્યા હતા. અગાઉના સત્રમાં ચાંદી ₹2,37,620 પર બંધ થઈ હતી.
વૈશ્વિક બજારમાં પણ સોના-ચાંદી પર દબાણ સતત યથાવત રહ્યું છે. સ્પોટ ગોલ્ડમાં 0.6%નો ઘટાડો નોંધાઈને તે $4,184.33 પ્રતિ ઔંસ પર આવી ગયું છે. અમેરિકન ગોલ્ડ ફ્યુચરમાં પણ લગભગ 1%ની ઘટાડો જોવા મળ્યો અને તે $4,202.10 પર પહોંચી ગયો છે. સ્પોટ સિલ્વર પણ 1.5% ઘટીને $64.83 પ્રતિ ઔંસ પર ટ્રેડ થઈ રહ્યું છે.
કિંમતી ધાતુઓ પર દબાણ વધ્યું
ડોલર ઈન્ડેક્સ એક વર્ષના ઉચ્ચ સ્તર નજીક પહોંચી ગયો છે જેના કારણે અન્ય કરન્સી ધરાવનારા રોકાણકારો માટે સોનું અને ચાંદી વધુ મોંઘા બન્યા છે. પરિણામે આંતરરાષ્ટ્રીય બજારમાં માંગ ઘટી રહી છે અને કિંમતી ધાતુઓ પર દબાણ વધી રહ્યું છે. અમેરિકી ફેડરલ રિઝર્વે તાજેતરમાં વ્યાજદરમાં કોઈ ફેરફાર કર્યો નથી, પરંતુ 19 અધિકારીઓમાંથી 9 અધિકારીઓએ આ વર્ષે વ્યાજદર વધારવાની શક્યતા દર્શાવી છે.
CME ફેડવોચ ટૂલ મુજબ બજારમાં ડિસેમ્બર મહિનામાં વ્યાજદર વધારાની 87% શક્યતા માનવામાં આવી રહી છે, જે અગાઉ 61% હતી. ઉંચા વ્યાજદરના કારણે સોનામાં રોકાણ ઓછું આકર્ષક બને છે કારણ કે તેમાં કોઈ વ્યાજ આવક મળતી નથી.
આ તરફ ગોલ્ડમેન સૈક્સે પણ સોનાના ભાવ અંગેનો અંદાજ ઘટાડીને ડિસેમ્બર માટે $4,900 પ્રતિ ઔંસ કર્યો છે, જે અગાઉ $5,400 હતો. બેંકનું માનવું છે કે આ વર્ષે ફેડ તરફથી વ્યાજદર ઘટાડાની શક્યતા પણ હવે ઓછી થઈ ગઈ છે.ભૂ-રાજકીય પરિસ્થિતિઓમાં પણ બદલાવ જોવા મળી રહ્યો છે. કાચા તેલના ભાવ ઘટ્યા છે અને ઇન્ફ્લેશન અંગેની ચિંતાઓમાં ઘટાડો થયો છે. હોર્મુઝ જળસંધિમાંથી તેલ પરિવહન ફરી શરૂ થયું છે અને અમેરિકાએ ઈરાન પર લાગેલી કેટલીક પ્રતિબંધો હટાવવાની જાહેરાત કરી છે. આ તમામ પરિબળોએ મળીને સોનું-ચાંદીના બજારમાં વધુ દબાણ ઊભું કર્યું છે.
DISCLAIMER બિઝનેસને લગતો આ આર્ટિકલ ન્યૂઝ આધારિત છે જેમાં રિસ્કનું પ્રમાણ વધુ હોય શકે છે, કોઈ પણ જગ્યાએ રોકાણ કે બિઝનેસને લગતો વહીવટ કરતી વખતે એક વખત માર્કેટ નિષ્ણાંતની સલાહ લેવી જરૂરી છે, newbharat.news કોઈ પણ મુશ્કેલી માટે બંધનકર્તા રહેશે નહીં જેની ખાસ નોંધ લેવી.