સમગ્ર રાજ્યમાં ઠંડીનો પારો ગગડતા જનજીવન પ્રભાવિત થયું છે, ત્યારે સુરેન્દ્રનગર જિલ્લામાં કાતિલ ઠંડીએ એક યુવકનો ભોગ લીધો હોવાની ઘટના સામે આવી છે. વઢવાણ નજીક ચાલવા નીકળેલા એક યુવકને અચાનક હાર્ટ એટેક આવતા તેનું ઘટનાસ્થળે જ મોત નીપજ્યું હતું.
મળતી માહિતી મુજબ, સુરેન્દ્રનગરના વઢવાણ વિસ્તારમાં રહેતા ગોપાલભાઈ જાની નામનો યુવક વોકિંગ માટે નીકળ્યો હતો. સુરેન્દ્રનગરમાં ઠંડીનો પારો 10 ડિગ્રીની નજીક પહોંચી ગયો હોવાથી વાતાવરણમાં ભારે ઠંડક હતી. આ કડકડતી ઠંડીની લપેટમાં આવી જવાથી યુવકને અચાનક હાર્ટ એટેક આવ્યો હતો. આસપાસના લોકો એકઠા થાય તે પહેલા જ યુવકે અંતિમ શ્વાસ લીધા હતા. ઘટનાની જાણ થતા જ વઢવાણ પોલીસ ઘટનાસ્થળે પહોંચી હતી. યુવકના મૃતદેહને પોસ્ટમોર્ટમ (P.M.) માટે વઢવાણની સરકારી હોસ્પિટલ ખાતે ખસેડવામાં આવ્યો છે.
વઢવાણ પોલીસે અકસ્માતે મોતનો ગુનો નોંધી વધુ તપાસ હાથ ધરી છે. આ બનાવથી મૃતકના પરિવારમાં શોકનું મોજું ફરી વળ્યું છે.વહેલી સવારે અને મોડી સાંજે ઘરની બહાર ન નીકળવા તંત્ર દ્વારા અપીલ કરવામાં આવી છે. ઉપરાંત કાતિલ ઠંડીના કારણે હાર્ટ એટેક સહિતના દર્દીઓને સાવચેતી રાખવાની અપીલ કરી છે.