NEET-UG 2026 પરીક્ષાની નવી તારીખ આખરે જાહેર કરવામાં આવી છે, જેના કારણે લાખો વિદ્યાર્થીઓમાં ચાલી રહેલી અનિશ્ચિતતા દૂર થઈ છે. પેપર લીક વિવાદ બાદ હવે પરીક્ષા 21 જૂન 2026, રવિવારના રોજ યોજાશે.
નેશનલ ટેસ્ટિંગ એજન્સી (NTA) દ્વારા NEET-UG 2026 પરીક્ષાને લઈને નવી તારીખ જાહેર કરવામાં આવી છે. હવે આ પરીક્ષા 21 જૂન 2026, રવિવારના દિવસે લેવામાં આવશે. પેપર લીકના ગંભીર આરોપો સામે આવ્યા બાદ અગાઉ લેવાયેલી પરીક્ષા રદ કરવાની સ્થિતિ ઊભી થઈ હતી, જેના કારણે લાખો વિદ્યાર્થીઓ અને તેમના વાલીઓમાં ચિંતા અને અનિશ્ચિતતા ફેલાઈ હતી. 3 મેના રોજ દેશભરમાં આશરે 23 લાખથી વધુ વિદ્યાર્થીઓએ NEET-UG પરીક્ષા આપી હતી. પરંતુ ત્યારબાદ પેપર લીક થવાના આક્ષેપો સામે આવ્યા અને સમગ્ર મામલો ચર્ચામાં આવ્યો. આ ઘટનાને કારણે પરીક્ષાની પારદર્શિતા અને સુરક્ષા વ્યવસ્થા પર ગંભીર સવાલો ઉભા થયા હતા. સ્થિતિ ગંભીર બનતાં સંબંધિત વિભાગોએ તપાસ શરૂ કરી અને અંતે પરીક્ષા ફરીથી યોજવાનો નિર્ણય લેવામાં આવ્યો.
આ નિર્ણય પહેલાં દિલ્હીમાં ઉચ્ચ સ્તરીય બેઠક યોજાઈ હતી, જેમાં શિક્ષણ મંત્રી ધર્મેન્દ્ર પ્રધાનના નિવાસસ્થાને મહત્વપૂર્ણ ચર્ચાઓ કરવામાં આવી. આ બેઠકમાં ઉચ્ચ શિક્ષણ સચિવ, સ્કૂલ શિક્ષણ સચિવ, NTAના ડિરેક્ટર જનરલ, CBSEના ચેરપર્સન તેમજ કેન્દ્રીય વિદ્યાલય સંગઠન અને નવોદય વિદ્યાલય સમિતિના કમિશનર સહિત અનેક ઉચ્ચ અધિકારીઓ હાજર રહ્યા હતા. બેઠકનો મુખ્ય ઉદ્દેશ્ય પેપર લીક જેવી ગંભીર ઘટના બાદ પરીક્ષા વ્યવસ્થાને વધુ મજબૂત અને વિશ્વસનીય કેવી રીતે બનાવવી તે અંગે ચર્ચા કરવો હતો.
સરકારી સ્તરે થયેલી આ ચર્ચાઓમાં પરીક્ષાની નવી તારીખ નક્કી કરવાની સાથે સાથે આગળ આવી સમસ્યાઓ ફરી ન થાય તે માટે કડક સુરક્ષા પગલાં લેવા પર ભાર મૂકવામાં આવ્યો હતો. પરીક્ષા પ્રક્રિયામાં ટેક્નોલોજીનો વધુ ઉપયોગ, પ્રશ્નપત્રની સુરક્ષા વધારવી અને જવાબદાર એજન્સીઓની જવાબદારી નક્કી કરવાની બાબતો પર પણ ચર્ચા કરવામાં આવી હોવાનું જાણવા મળે છે.
વિરોધ પ્રદર્શન પણ જોવા મળ્યા
આ વચ્ચે દેશમાં અલગ-અલગ જગ્યાએ આ મુદ્દે વિરોધ પ્રદર્શન પણ જોવા મળ્યા હતા. અમદાવાદમાં NSUIના કાર્યકરો દ્વારા શિક્ષણ મંત્રી ધર્મેન્દ્ર પ્રધાન સામે વિરોધ વ્યક્ત કરવામાં આવ્યો હતો. તેમણે કાળા ઝંડા બતાવીને નારાજગી વ્યક્ત કરી અને મંત્રીના કાફલાને રોકવાનો પ્રયાસ પણ કર્યો હતો. આ પ્રદર્શન બાદ પોલીસે તાત્કાલિક કાર્યવાહી કરીને કેટલાક કાર્યકરોને અટકાયતમાં લીધા હતા. પેપર લીકના મુદ્દે વિદ્યાર્થીઓ અને વિવિધ સંગઠનોમાં ભારે અસંતોષ જોવા મળી રહ્યો છે.
બીજી તરફ તપાસ એજન્સી CBI દ્વારા પણ આ મામલે કાર્યવાહી તેજ કરવામાં આવી છે. અત્યાર સુધીમાં કુલ 7 લોકોની ધરપકડ કરવામાં આવી છે. કોર્ટ દ્વારા કેટલાક આરોપીઓને પોલીસ કસ્ટડીમાં મોકલવામાં આવ્યા છે, જેમાં 5 આરોપીઓને 7 દિવસની કસ્ટડી આપવામાં આવી છે. તપાસ દરમિયાન રાજસ્થાન, હરિયાણા અને મહારાષ્ટ્ર જેવા રાજ્યોમાંથી આરોપીઓની ધરપકડ કરવામાં આવી છે. આ કેસમાં એક આરોપીએ અન્ય વ્યક્તિને પ્રશ્નપત્ર પહોંચાડ્યું હોવાનું પણ તપાસમાં સામે આવ્યું છે, જે સમગ્ર ગેરરીતિના નેટવર્ક તરફ સંકેત કરે છે.
આ સમગ્ર ઘટનાક્રમને કારણે NEET જેવી મહત્વપૂર્ણ પરીક્ષા ફરી એકવાર ચર્ચામાં આવી છે. લાખો વિદ્યાર્થીઓના ભવિષ્ય સાથે જોડાયેલી આ પરીક્ષા અંગે સરકાર અને સંબંધિત એજન્સીઓ હવે વધુ કડક અને પારદર્શક વ્યવસ્થા લાવવાના દાવા કરી રહી છે, જેથી આવી ઘટનાઓ ફરી ન બને. વિદ્યાર્થીઓ હવે નવી તારીખ મુજબ ફરી તૈયારીમાં લાગી ગયા છે, જ્યારે સમગ્ર દેશની નજર આ કેસની આગળની તપાસ અને પરિણામો પર ટકેલી છે.